Tá acmhainneacht iomaíochais agus nuálaíochta an Aontais ag brath go mór ar scileanna. Anuas air sin tá scileann ar cheann de na príomhrudaí a dhéanann an comhtháthú sóisialta agus folláine an duine a chinntiú. De dheasca claochluithe sóisialta leanúnacha agus athstruchtúrú tapa eacnamaíoch, níl an dara rogha ag daoine ach tabhairt faoin bhfoghlaim ar feadh an tsaoil. Dá bhrí sin tá na Ballstáit ag tabhairt faoi athchóirithe chun cur le hacmhainneacht a gcóras oideachais agus oiliúna ionas go mbeidh siad in ann oideachas ar ardchaighdeán a chur ar fáil, oideachas a mbeidh rochtain leanúnach chomhionann ag a saoránaigh air. Tugann an Coimisiún tacaíocht dóibh trí shaineolas a chur ar fáil, mar aon leis an deis cleachtais ábhartha a chleachtadh, agus ar an gcaoi sin cuireann sé leis an tacaíocht eile atá ar fáil.
I gcomhréir le tosaíochtaí an Choimisiúin Eorpaigh agus le tosaíochtaí náisiúnta, cuidíonn an Coimisiúin leis na Ballstáit a gcórais oideachais agus oiliúna a athchóiriú ar bhealach a chuidíonn chun téarnamh a dhéanamh ó chur isteach phaindéim an choróinvíris, agus ar bhealach a dhéanann na córais sin níos athléimní go fadtéarmach, le béim ar an tionchar diúltach sóisialta a chomhrac.
Chun é sin a bhaint amach, téann an Coimisiún i gcomhar le húdaráis riaracháin na mBallstát ar raon leathan ábhar. I measc na ndreamanna a bhaineann tairbhe as sin tá Aireachtaí atá i gceannas ar an oideachas, an gairmoideachas agus an ghairmoiliúint, ar an bhfostaíocht agus ar an taighde agus an nuálaíocht, chomh maith le gníomhaireachtaí stáit ábhartha agus údaráis réigiúnacha.
Tuilleadh eolais faoinár dtionscadail >
Íoslódáil an bróisiúr faoi Scileanna, Oideachas agus Oiliúint >
An t-oideachas ionchuimsitheach
I measc na réimsí ar cheart tacaíocht a thabhairt dóibh le haghaidh oideachas ionchuimsitheach a bhaint amach, tá riachtanais i ndáil leis an oideachas speisialta, luathfhágáil na scoile a chomhrac agus cáilíocht oideachas agus cúram na luath-óige a fheabhsú. Cuireann an Coimisiún tacaíocht ar fáil chun feabhas a chur ar rialachas, cáilíocht agus solúbthacht an oideachais aosaigh. Leagtar béim faoi leith ar fheabhas a chur ar scileanna agus inniúlachtaí digiteacha, i measc an lucht saothair agus i measc na saoránach i gcoitinne araon. Maidir le gairmoideachas agus gairmoiliúint, is é is aidhm do na hathchóirithe cur le hinoiriúnaitheacht agus cumas na gcóras tacú le forbairt scileanna ábhartha.
SAMPLAÍ DE RÉIMSÍ TACAÍOCHTA
- Aghaidh a thabhairt ar thorthaí an oideachais ísil agus ar dhaoine a fhágann an scoil go luath
- An t-oideachas aosach
- An t-oideachas digiteach agus scileanna digiteacha
- Oideachas agus cúram na luath-óige
- Éifeachtúlacht na gcóras maoiniúcháin agus caiteachais
- An t-oideachas ionchuimsitheach
- Monatóireacht ar chórais oideachais agus ar cheapadh beartas
- An gairmoideachas agus an ghairmoiliúint
Tá an Coimisiún ag tacú le hAireacht Oideachais na Portaingéile chun plé a spreagadh leis na páirtithe leasmhara ábhartha chun caighdeáin, táscairí agus próisis a shainiú i gcóras cuimsitheach ar mhaithe le monatóireacht a dhéanamh ar chur chun feidhme an dlí nua ar an oideachas ionchuimsitheach.
Tacaíonn an Coimisiún le hAireacht Oideachais na Fraince chun athchóiriú a dhéanamh ar chreat cur chun feidhme maidir le hIonaid Barr Feabhais na Fraince (Campus des Métiers) ionas go bhféadfaí feabhas a chur ar a gcáilíocht agus a n-éifeachtacht.
Chuir an Coimisiún tacaíocht theicniúil ar fáil don Bheilg, don Spáinn, don Ísiltír, don Phortaingéil agus don Ungáir, chun a gcórais oideachais aosaigh a uasghrádú.
An t-ardoideachas agus an taighde
Ina theannta sin, tacaíonn an Coimisiún le hathchóirithe chun cáilíocht a ardú agus barr feabhais a spreagadh san ardoideachas agus taighde, cuir i gcás beartais chun córais a dhéanamh níos ionchuimsithí, níos nasctha agus níos nuálaí.
Leis na hathchóirithe ar fud earnálacha uile an oideachais agus taighde, dírítear ar cháilíocht agus gairmiúlacht an lucht teagaisc a fheabhsú, ina measc sin ceannairí oideachais.
SAMPLAÍ DE RÉIMSÍ TACAÍOCHTA
- Athchóiriú curaclaim (measúnú daltaí san áireamh)
- An t-ardoideachas, an taighde agus an nuálaíocht
- Beartas i leith múinteoirí agus ceannaireachta scoile
Chuir an Coimisiún tacaíocht theicniúil ar fáil don Bhulgáir, don Chróit, don Eastóin, don Liotuáin agus don tSlóvaic chun a mbeartais i leith múinteoirí a uasghrádú agus chun tacú le cur chun feidhme a n-athchóirithe curaclaim.
Tá an Coimisiún ag tacú le hAireacht Oideachais agus Oiliúna Fhlóndras (an Bheilg) chun córas éifeachtach ionduchtaithe a chur ar bun le haghaidh múinteoirí nua d’fhonn dul i ngleic le luathfhágáil na gairme beatha sin agus gairmeacha níos fearr a chinntiú do mhúinteoirí go fadtéarmach.
Tá an Coimisiún ag tacú leis an iarracht atá ar bun ag an Ungáir athbhreithniú a dhéanamh ar a creat straitéiseach maidir le claochlú digiteach an chórais ardoideachais, agus iad ag forbairt an mhéid atá i mbeartais agus cleachtais tíortha eile.
