It-tibdil fil-klima u d-degradazzjoni ambjentali huma theddida eżistenzjali għall-Unjoni Ewropa u għad-dinja. Biex negħlbu dawn l-isfidi, il-Patt Ekoloġiku Ewropew huwa l-istrateġija l-ġdida tal-Ewropa għat-tkabbir, li se tittrasforma l-Unjoni f’ekonomija moderna, effiċjenti fl-użu tar-riżorsi u kompetittiva. Il-Patt Ekoloġiku Ewropew għandu l-għan li jagħmel l-Ewropa newtrali għall-klima sal-2050, jagħti spinta lill-ekonomija permezz ta’ teknoloġija ekoloġika, joħloq industrija u trasport sostenibbli, u jnaqqas it-tniġġis. It-trasformazzjoni tal-isfidi klimatiċi u ambjentali f’opportunitajiet se tagħmel it-tranżizzjoni ġusta u inklużiva għal kulħadd.
Il-Kummissjoni Ewropea tgħin lill-Istati Membri tal-UE jfasslu u jimplimentaw riformi li jappoġġjaw it-tranżizzjoni ekoloġika u li jikkontribwixxu għall-kisba tal-għanijiet tad-Patt Ekoloġiku Ewropew. Tgħin ukoll fit-tfassil tal-proċeduri meħtieġa fl-amministrazzjonijiet ċentrali u lokali u tistabbilixxi l-istrutturi ta’ koordinazzjoni li huma meħtieġa għall-implimentazzjoni tal-politiki ekoloġiċi.
Aktar dwar il-proġetti tagħna >
Iddawnlowdja l-fuljett dwar l-Appoġġ tekniku għall-implimentazzjoni tal-Patt Ekoloġiku Ewropew >
![Green transition](https://reform-support.ec.europa.eu/sites/default/files/styles/oe_theme_medium_no_crop/public/2021-05/AdobeStock_199850553.jpeg?itok=O7FKw4xU)
Azzjoni klimatika u tnaqqis fl-emissjonijiet
L-azzjoni klimatika hija fil-qalba tal-Patt Ekoloġiku Ewropew. L-UE diġà wriet li hija kienet kapaċi tnaqqas l-emissjonijiet ta’ gassijiet b’effett ta’ serra tagħha, filwaqt li żammet it-tkabbir ekonomiku. Għad fadal ħafna xi jsir fis-snin li ġejjin. L-UE stabbilixxiet il-miri tagħha biex tilħaq in-newtralità klimatika sal-2050, għalhekk dan se jirrikjedi li l-Istati Membri kollha jimplimentaw sett koerenti ta’ politiki dwar il-klima.
Il-Kummissjoni Ewropea, permezz tal-Istrument ta’ Appoġġ Tekniku, tgħin lill-awtoritajiet nazzjonali jfasslu u jimplimentaw riformi li jappoġġjaw l-ambizzjonijiet klimatiċi tagħhom.
EŻEMPJI TA’ APPOĠĠ
- L-iżvilupp ta’ politika dwar il-klima, inklużi pariri dwar strateġiji u pjanijiet ta’ azzjoni dwar il-klima, u appoġġ għall-immudellar tal-emissjonijiet ta’ gassijiet b’effett ta’ serra.
- L-appoġġ għall-użu tal-art u l-immaniġġjar tal-foresti, inklużi l-ippjanar urban, l-ibliet SMART u l-kontabbiltà u l-inventarju tal-foresti.
- It-titjib tal-protezzjoni kostali kif ukoll l-immaniġġjar tar-riskju tal-għargħar u tal-erożjoni kostali.
- L-iżvilupp ta’ soluzzjonijiet ibbażati fuq in-natura biex jiġu indirizzati l-mewġiet tas-sħana, in-nixfa, l-għargħar u l-kwalità ħażina tal-arja fiż-żoni urbani.
- L-implimentazzjoni ta’ strumenti ta’ finanzjament taħt is-sistema tal-UE għall-iskambju ta’ kwoti tal-emissjonijiet.
- L-appoġġ għad-dekarbonizzazzjoni tas-sistemi tal-elettriku, inkluż it-tfassil ta’ swieq li ma jagħmlux ħsara lill-enerġija rinnovabbli u oqfsa regolatorji.
- L-iżvilupp ta’ skemi ta’ sostenn ibbażati fuq is-suq għall-enerġija rinnovabbli u l-investimenti fl-effiċjenza fl-użu tal-enerġija.
- L-iżvilupp ta’ pjanijiet nazzjonali għall-enerġija u l-klima, inkluż l-immudellar analitiku u tal-enerġija.
- Il-valutazzjoni tal-politiki għal sistemi ta’ tisħin u tkessiħ effiċjenti fl-użu tal-enerġija.
- It-titjib tal-investimenti fl-effiċjenza fl-użu tal-enerġija fil-bini.
- Id-definizzjoni ta’ politiki dwar trasport/mobbiltà sostenibbli u fjuwils alternattivi.
- It-tisħiħ tat-trasport bil-passaġġi fuq l-ilma interni u l-ferroviji ta’ veloċità għolja.
![Flag of Hungary with sky](/sites/default/files/styles/oe_theme_ratio_3_2_medium/public/2022-11/Hungary_flag_photo.jpg?itok=D1MjRN_o)
Appoġġ biex jiġi stabbilit qafas ta’ monitoraġġ u evalwazzjoni għall-politiki dwar il-klima u l-enerġija, kif ukoll titjib tal-metodoloġiji tal-valutazzjoni tal-impatt ambjentali (VIA).
![Flag of Greece with sky](/sites/default/files/styles/oe_theme_ratio_3_2_medium/public/2022-11/Greece_flag_photo.jpg?itok=1yPLprzs)
Appoġġ biex jitjiebu l-kundizzjonijiet qafas għall-investimenti fl-enerġija nadifa fil-Greċja, b’mod partikolari għall-enerġija rinnovabbli u għall-effiċjenza fl-użu tal-enerġija.
![Flag of Hungary with sky](/sites/default/files/styles/oe_theme_ratio_3_2_medium/public/2022-11/Hungary_flag_photo.jpg?itok=D1MjRN_o)
Appoġġ biex jiġu identifikati riformi ta’ politika u strumenti ta’ finanzjament għall-effiċjenza fl-użu tal-enerġija fil-bini.
![Flag of Belgium with sky](/sites/default/files/styles/oe_theme_ratio_3_2_medium/public/2022-11/Belgium_flag_photo.jpg?itok=ghHsdpVH)
Il-Kummissjoni qed tgħin lill-Port ta’ Antwerp biex iċaqlaq il-merkanzija mit-triq għall-ferroviji u l-passaġġi fuq l-ilma interni. L-għan huwa li titnaqqas il-konġestjoni fit-toroq u li jittejbu n-navigazzjoni u l-koordinazzjoni tal-bastimenti fiż-żona tal-port.
Tranżizzjoni ġusta
L-Istati Membri, ir-reġjuni u s-setturi kollha tal-UE jridu jikkontribwixxu għat-tranżizzjoni lejn ekonomija newtrali għall-klima. Madankollu, l-iskala tal-isfida mhijiex l-istess għal kulħadd. Ir-reġjuni li jiddependu fuq il-fjuwils fossili u l-industriji intensivi fl-użu tal-karbonju se jiġu affettwati b’mod partikolari u se jgħaddu minn trasformazzjoni ekonomika, ambjentali u soċjali profonda.
Il-Kummissjoni Ewropea qed tgħin lill-Istati Membri jimmobilizzaw ir-riżorsi u jieħdu azzjonijiet biex jiżguraw appoġġ immirat għar-reġjuni u s-setturi li huma l-aktar affettwati minn din it-tranżizzjoni. Permezz tal-Istrument ta’ Appoġġ Tekniku, id-DĠ REFORM qed jappoġġja wkoll 17-il Stat Membru fit-tħejjija tal-pjanijiet ta’ tranżizzjoni territorjali ġusta tagħhom, li kull Stat Membru se jkollu jfassal biex jikseb aċċess għall-finanzjament mill-Mekkaniżmu għal Tranżizzjoni Ġusta.
EŻEMPJI TA’ APPOĠĠ
- Il-valutazzjoni tal-isfidi u l-ħtiġijiet tat-tranżizzjoni.
- It-tħejjija ta’ pjan ta’ azzjoni b’pjan direzzjonali ta’ miżuri meħtieġa għat-tranżizzjoni lejn ekonomija newtrali għall-klima.
- L-appoġġ għall-konsultazzjonijiet mal-partijiet ikkonċernati biex jinbena kunsens dwar kif issir it-tranżizzjoni lejn ekonomija newtrali għall-klima.
- Il-proposta ta’ mekkaniżmi ta’ governanza għall-implimentazzjoni tat-tranżizzjoni.
![Flag of Slovakia with sky](/sites/default/files/styles/oe_theme_ratio_3_2_medium/public/2022-11/Slovakia_flag_photo.jpg?itok=W0yvdKxh)
Appoġġ biex tiġi stabbilita strateġija għat-tranżizzjoni tar-reġjun mill-produzzjoni tal-faħam għal attivitajiet ekonomiċi oħra.
Żvilupp sostenibbli
L-UE hija impenjata bis-sħiħ li tkun minn ta’ quddiem fl-implimentazzjoni tal-Aġenda 2030 għall-Iżvilupp Sostenibbli, flimkien mal-Istati Membri tagħha. Is-17-il Għan ta’ Żvilupp Sostenibbli (SDGs) kollha huma dwar it-titjib tal-ħajja tan-nies u l-protezzjoni tal-pjaneta mid-degradazzjoni, sabiex tkun tista’ tappoġġja l-ħtiġijiet tal-ġenerazzjonijiet preżenti u futuri. Mill-2020 il-Kummissjoni Ewropea saħħet l-analiżi u l-monitoraġġ tagħha tal-kisba tal-SDGs fil-proċess tas-Semestru Ewropew. B’mod parallel, l-Istati Membri qed jintegraw l-SDGs fit-tfassil tal-politika tagħhom u qed jiżviluppaw politiki mmirati biex jimxu lejn żvilupp aktar sostenibbli.
EŻEMPJI TA’ APPOĠĠ
- L-iżvilupp ta’ strateġija ta’ żvilupp sostenibbli għall-2050.
- L-iżvilupp ta’ pjan ta’ azzjoni biex jittejjeb il-benesseri għar-residenti rurali u tiġi żgurata l-istabbiltà ekonomika taż-żoni rurali.
- L-implimentazzjoni tal-istrateġija għall-iżvilupp sostenibbli li tintegra l-SDGs fit-teħid tad-deċiżjonijiet fil-livelli kollha tal-gvern.
![Flag of Italy with sky](/sites/default/files/styles/oe_theme_ratio_3_2_medium/public/2022-11/Italy_flag_photo_0.jpg?itok=yJznieqW)
Sabiex jimplimenta l-Aġenda 2030 għall-Iżvilupp Sostenibbli, fl-2017 il-Gvern Taljan adotta strateġija nazzjonali għall-iżvilupp sostenibbli.
Enerġija
Id-dekarbonizzazzjoni tas-sistema tal-enerġija hija kruċjali biex jintlaħqu l-objettivi klimatiċi fl-2030 u l-2050. Fl-istess ħin, l-enerġija trid tkun sigura u affordabbli għall-konsumaturi u n-negozji. Biex dan iseħħ, l-Istati Membri jridu jittrasformaw is-sistemi tal-enerġija tagħhom f’suq tal-enerġija tal-UE kompletament integrat, diġitalizzat u kompetittiv li huwa bbażat l-aktar fuq sorsi rinnovabbli. Minbarra r-riformi regolatorji, l-Istati Membri jeħtieġ li jippermettu u jippromwovu aktar investimenti fl-enerġija nadifa, inkluża l-effiċjenza fl-użu tal-enerġija.
EŻEMPJI TA’ APPOĠĠ
- L-adattament tal-qafas leġiżlattiv u regolatorju biex jiżdiedu l-ishma tal-enerġija rinnovabbli.
- Id-definizzjoni ta’ miżuri ta’ politika għall-promozzjoni tal-effiċjenza fl-użu tal-enerġija.
- It-tfassil ta’ swieq tal-elettriku kompetittivi.
- It-tneħħija tal-ostakli għall-finanzjament u għas-swieq tas-servizzi għal enerġija nadifa.
- L-appoġġ għall-ippjanar strateġiku permezz tal-immudellar u l-analiżi tal-enerġija.
![Flag of EU with sky](/sites/default/files/styles/oe_theme_ratio_3_2_medium/public/2022-11/Europe_flag_photo.jpg?itok=f8BCLdvL)
The European Commission supported 17 Member States in identifying reforms and investments to reduce dependencies on fossil fuel imports from Russia and implement the REPowerEU.
Trasport u mobbiltà
It-trasport jippermetti lin-nies, is-servizzi u l-oġġetti li jiċċaqalqu liberament fl-Unjoni Ewropea. Huwa pedament tal-integrazzjoni tal-UE u jgħaqqad flimkien nies f’reġjuni u pajjiżi differenti, u kontributur ewlieni għall-ekonomija. Id-domanda għat-trasport qed tkompli tiżdied hekk kif l-ekonomiji jsiru aktar integrati. Dan iġib miegħu opportunitajiet iżda wkoll sfidi ġodda. B’mod partikolari, it-trasport jirrappreżenta kważi kwart tal-emissjonijiet tal-gassijiet serra tal-UE u huwa waħda mill-kawżi ewlenin tat-tniġġis tal-arja fl-ibliet. L-Istati Membri qed ifittxu modi biex jiżviluppaw soluzzjonijiet tat-trasport intelliġenti, sostenibbli u effiċjenti. Dan jeħtieġ li l-utenti jitqiegħdu l-ewwel u jiġu pprovduti b’alternattivi aktar affordabbli, aktar aċċessibbli, aktar tajbin għas-saħħa u aktar nodfa.
EŻEMPJI TA’ APPOĠĠ
- L-analiżi tal-politiki, l-istrumenti ekonomiċi u l-oqfsa legali.
- It-twettiq ta’ analiżi tal-ispejjeż imqabbla mal-benefiċċji.
- L-iżvilupp ta’ mmudellar fuq xenarji u impatti ta’ investiment.
- L-iżvilupp ta’ rakkomandazzjonijiet ta’ politika, pjanijiet ta’ azzjoni u pjanijiet direzzjonali.
- It-tfassil ta’ strateġiji u pjanijiet ta’ komunikazzjoni.
Ambjent u ekonomija ċirkolari
Id-degradazzjoni ambjentali hija mistennija li taffettwa aktar u aktar l-attività ekonomika. Din tista’ tikkawża kundizzjonijiet estremi tat-temp, tinfluwenza s-saħħa tal-bniedem u tagħmel ir-riżorsi naturali inqas aċċessibbli. Il-protezzjoni tal-kapital naturali tal-UE, it-tranżizzjoni lejn ekonomija effiċjenti fir-riżorsi u l-protezzjoni tan-nies minn pressjonijiet relatati mal-ambjent huma prijoritajiet ewlenin tal-Patt Ekoloġiku Ewropew. L-Istati Membri qed jinvolvu ruħhom f’riformi biex jindirizzaw dawn l-isfidi billi jiżviluppaw aktar il-politiki u l-istrateġiji ambjentali tagħhom.
Id-DĠ REFORM jappoġġja lill-awtoritajiet nazzjonali fit-tfassil u l-implimentazzjoni ta’ riformi li jgħinu biex tiġi indirizzata d-degradazzjoni ambjentali.
EŻEMPJI TA’ APPOĠĠ
- Id-definizzjoni ta’ politiki nazzjonali u muniċipali għall-immaniġġjar tal-iskart.
- It-tħejjija ta’ strateġiji u pjanijiet ta’ azzjoni nazzjonali għal ekonomija ċirkolari.
- L-istrumenti ta’ implimentazzjoni għad-dekarbonizzazzjoni tal-industriji.
- L-appoġġ għall-immaniġġjar tal-ilma u l-monitoraġġ tas-servizzi tal-ilma.
![Flag of Greece with sky](/sites/default/files/styles/oe_theme_ratio_3_2_medium/public/2022-11/Greece_flag_photo.jpg?itok=1yPLprzs)
Sfida ewlenija għall-Greċja hija li ttejjeb l-immaniġġjar tal-iskart f’konformità mal-ekonomija ċirkolari.
![Flag of the Netherlands with sky](/sites/default/files/styles/oe_theme_ratio_3_2_medium/public/2022-11/Netherlands_flag_photo.jpg?itok=Ny0a_TS5)
F’pajjiż b’popolazzjoni densa bħan-Netherlands, hemm ħtieġa qawwija għal approċċ ikkoordinat għall-immaniġġjar taż-żona.
![Flag of Romania with sky](/sites/default/files/styles/oe_theme_ratio_3_2_medium/public/2022-11/Romania_flag_photo.jpg?itok=VoxIbP3U)
Appoġġ għar-regolatur ekonomiku Rumen biex ikollu rwol kritiku bħala r-repożitorju ċentrali tal-informazzjoni dwar il-prestazzjoni u l-konformità.
Riċerka u innovazzjoni
It-teknoloġiji diġitali għandhom impatt profond fuq il-mod kif ngħixu u nagħmlu n-negozju tagħna. Jeħtieġ li l-Istati Membri jkollhom il-kapaċità li jibbenefikaw mis-soċjetà dejjem aktar diġitalizzata tagħna u li jiffaċċjaw l-isfidi li ġġib magħha. Dan jirrikjedi t-tfassil ta’ politiki u l-użu ta’ soluzzjonijiet innovattivi biex in-negozji jingħataw il-kunfidenza, il-kompetenzi u l-mezzi għad-diġitalizzazzjoni u t-tkabbir. Strateġija ta’ riċerka u innovazzjoni sistematika u li tħares ’il quddiem hija kruċjali għal ekonomija aktar produttiva u ekoloġika.
EŻEMPJI TA’ APPOĠĠ
- It-tisħiħ tal-kooperazzjoni bejn in-negozji u x-xjenza biex tittejjeb l-implimentazzjoni tal-politiki tal-innovazzjoni.
- L-indirizzar tan-nuqqas ta’ kapaċità fl-istituti tar-riċerka, b’mod partikolari permezz tal-kondiviżjoni tal-għarfien u l-aħjar prattiki.
- Iż-żieda fil-prestazzjoni innovattiva ta’ intrapriżi żgħar u ta’ daqs medju.
![Flag of Lithuania with sky](/sites/default/files/styles/oe_theme_ratio_3_2_medium/public/2022-11/Lithuania_flag_photo.jpg?itok=WoiSLT3h)
Sabiex tingħata spinta lill-kapaċità ta’ innovazzjoni tal-Litwanja, l-awtoritajiet Litwani bdew jimplimentaw riforma fl-innovazzjoni.
Ekoloġizzazzjoni tal-finanzi pubbliċi u privati
Biex tinkiseb l-ambizzjoni tal-Patt Ekoloġiku Ewropew, huma meħtieġa investimenti sinifikanti. Is-settur privat se jkollu rwol ewlieni fil-finanzjament tat-tranżizzjoni ekoloġika. Dan jeħtieġ strateġiji konsistenti, oqfsa regolatorji innovattivi u strumenti intelliġenti. Il-gvernijiet nazzjonali se jkunu wkoll strumentali fil-finanzjament tat-tranżizzjoni billi jibagħtu s-sinjali t-tajba tal-prezzijiet u jorjentaw mill-ġdid in-nefqa pubblika lejn politiki sostenibbli. Jeħtieġ ukoll li jistimulaw id-domanda għal prodotti u servizzi aktar sostenibbli permezz ta’ akkwist pubbliku ekoloġiku u jnaqqsu l-marka tal-karbonju tas-servizzi pubbliċi. Qafas sod ta’ governanza se jiżgura li dawk li jieħdu d-deċiżjonijiet ikunu responsabbli lejn il-ġenerazzjonijiet futuri.
Biex jindirizza dawn l-isfidi, id-DĠ REFORM qed jappoġġja lill-Istati Membri fl-oqsma ta’:
- l-ibbaġitjar ekoloġiku u t-tassazzjoni ambjentali;
- l-akkwist ekoloġiku;
- il-finanzi u l-investiment sostenibbli.
EŻEMPJI TA’ APPOĠĠ
- It-tisħiħ tal-investimenti pubbliċi ekoloġiċi.
- L-implimentazzjoni ta’ reviżjonijiet tan-nefqa u n-nefqa fiskali ta’ politiki ekoloġiċi u li ma jagħmlux ħsara lill-ambjent (“griżi”) fl-oqfsa baġitarji.
- It-tfassil ta’ tassazzjoni ekoloġika u l-immudellar tal-impatt tagħha.
- L-implimentazzjoni tal-linji gwida tal-UE dwar l-ibbaġitjar ekoloġiku.
- L-iżvilupp ta’ pjan ta’ azzjoni dwar finanzi sostenibbli għall-Istati Membri u l-istituzzjonijiet promozzjonali nazzjonali.
- L-implimentazzjoni ta’ oqfsa ta’ bonds ekoloġiċi sovrani.
![Flag of Ireland with sky](/sites/default/files/styles/oe_theme_ratio_3_2_medium/public/2022-11/Ireland_flag_photo.jpg?itok=L0ki9fbl)
Il-qafas Irlandiż tal-ibbaġitjar tal-prestazzjoni jeħtieġ titjib biex jintuża għall-ibbaġitjar u r-rappurtar sostenibbli.
![Flag of Spain with sky](/sites/default/files/styles/oe_theme_ratio_3_2_medium/public/2022-11/Spain_flag_photo.jpg?itok=UzG5vOu0)
Il-Kummissjoni appoġġjat lill-bank promozzjonali nazzjonali Spanjol - ICO - fit-tfassil ta’ Pjan ta’ Azzjoni Strateġiku għall-finanzjament dirett ta’ attivitajiet u proġetti aktar sostenibbli (ekoloġiċi u soċjali).
![Flag of Lithuania with sky](/sites/default/files/styles/oe_theme_ratio_3_2_medium/public/2022-11/Lithuania_flag_photo.jpg?itok=WoiSLT3h)
Għalkemm il-Litwanja hija attiva fil-finanzjament ekoloġiku, il-livell attwali ta’ kapital miġbur għal dawn it-tipi ta’ investimenti mhuwiex biżżejjed fit-tul.